OBRADOIRO | ILUSTRACIÓN CON TECIDO E FÍO. ZARAPELLEIRAS | BEA LEMA

[MULLERES EN CADRIÑOS · ACTIVIDADES PARALELAS #PUNCTUM ]

A fanzineira Bea Lema é unha das integrantes da exposición #Punctum, beliscos de BD na arte contemporánea galega no Auditorio de Galicia. Gañadora do premio do público da última edición do Festival de BD de Angoulême convídanos a participar en 'Ilustración con tecido e fío. Zarapelleiras', un obradoiro dirixido a nenas e nenos de máis de dez anos que queiran coñecer a historia da arpillería, unha técnica de representación sobre zarapello ou tea de saco que xurdiu en Chile durante a ditadura militar e que adoitaba ser feita por grupos de mulleres. As zarapelleiras son pezas téxtiles tradicionais que poden representar paisaxes, costumes ou acontecementos importantes ou significativos para as persoas que contan a historia. A técnica consiste en elaborar figuras con retrincos de tea de diferentes texturas, que se cosen ou bordan con la ou fíos de cores sobre outra tea. Da man de Bea Lema crearemos unha ilustración que se trasladará á tea con tecidos compostos a modo de collage para crear unha escena. No proceso aprenderemos diferentes tipos de puntadas e técnicas, escolleremos os apliques a utilizar e bordaremos pequenos detalles para crear a nosa arpillera que poderemos levar para a casa.